३६ वर्षे २ महिने ७ दिवस विद्यार्थ्यांच्या कलागुणांना दिले प्रोत्साहन; ३१ ऑक्टोबर रोजी नियत वयोमानानुसार सेवापूर्ती”
परभणी/प्रतिनिधी :- रमेश मुलगीर
परभणी जिल्ह्यातील मानवत येथील नेताजी सुभाष माध्यमिक व उच्च माध्यमिक विद्यालयातील कलाशिक्षक मा. श्री. ज्ञानेश्वर सूर्यभान कौसाईतकर हे ३१ ऑक्टोबर २०२६ रोजी नियत वयोमानानुसार सेवानिवृत्त झाले. त्यांनी आपल्या प्रदीर्घ शैक्षणिक कारकिर्दीत तब्बल ३६ वर्षे २ महिने ७ दिवस इतकी सेवा पूर्ण केली. त्यांच्या सेवानिवृत्तीमुळे विद्यालयातील एका अनुभवी व समर्पित शिक्षकाच्या शैक्षणिक प्रवासाची सांगता झाली आहे.
ज्ञानेश्वर कौसाईतकर यांचे प्राथमिक ते माध्यमिक म्हणजेच इयत्ता पहिली ते दहावीपर्यंतचे शिक्षण त्यांच्या मूळ गावी रामपुरी बु. येथे झाले. त्यानंतर त्यांनी मानवत येथे आयटीआय (ITI) अभ्यासक्रम पूर्ण केला. कलाक्षेत्रातील आवड आणि शिक्षणाची ओढ लक्षात घेऊन त्यांनी पुढे शासकीय कला महाविद्यालय, संभाजीनगर येथे ए.टी.डी. (Art Teacher Diploma) ही पदविका प्राप्त केली.
शैक्षणिक पात्रता पूर्ण केल्यानंतर सन १९९० मध्ये ते मानवत येथील नेताजी सुभाष माध्यमिक व उच्च माध्यमिक विद्यालयात कलाशिक्षक म्हणून रुजू झाले. त्यानंतर त्यांनी आपल्या ज्ञानाचा, अनुभवाचा आणि कलात्मक कौशल्याचा उपयोग करून विद्यार्थ्यांना कलाशिक्षण दिले. आपल्या सेवाकाळात त्यांनी विद्यार्थ्यांमधील कलागुणांना वाव देण्याबरोबरच चित्रकला आणि सर्जनशीलतेची आवड निर्माण करण्यासाठी सातत्याने प्रयत्न केले.
शिक्षकी पेशातील आपली गुणवत्ता अधिक वृद्धिंगत करण्याच्या दृष्टीने त्यांनी सेवाकाळातच ए.एम. (AM) ही पदवीदेखील संपादन केली. शिक्षण, कला आणि विद्यार्थ्यांच्या सर्वांगीण विकासाप्रती असलेली त्यांची निष्ठा त्यांच्या प्रदीर्घ सेवेतून दिसून येते. त्या बरोबरच त्यांना २०२५ मध्ये सातारा येथे राज्यस्तरीय कलाध्यापक पुरस्कार मिळालेला आहे.
३१ ऑक्टोबर २०२६ रोजी नियत वयोमानानुसार ते सेवानिवृत्त झाले. त्यांच्या ३६ वर्षे २ महिने ७ दिवसांच्या प्रदीर्घ शैक्षणिक सेवेमुळे विद्यालयाच्या शैक्षणिक वाटचालीत त्यांचे योगदान महत्त्वपूर्ण राहिले आहे. त्यांच्या सेवापूर्तीच्या निमित्ताने त्यांच्यावर विविध स्तरांतून शुभेच्छांचा वर्षाव होत असून, सेवानिवृत्तीनंतरचे आयुष्य आरोग्यदायी, आनंदी आणि समाधानाचे जावो, अशा सदिच्छा व्यक्त केल्या जात आहेत.
